З 10 жніўня 2023 года ў Мастацкай галерэі Міхаіла Савіцкага пачынае працу мастацкая выстаўка «Мінскі настрой». Выстаўка арганізавана Музеем гісторыі горада Мінска сумесна з Беларускім саюзам мастакоў.
Прадстаўлена больш за 60 твораў жывапісу і графікі ў жанрах гарадскога пейзажа, партрэта, сюжэтна-тэматычнай карціны. Мінск і мінчане адлюстраваны ў работах народных мастакоў Беларусі Г.Х. Вашчанкі, Г.Г. Паплаўскага, а таксама такіх вядомых аўтараў, як С.П. Герус, А.М. Тычына, Р.У. Кудрэвіч, І.М. Басаў, Ф.М. Бараноўскі, У.М. Пасюкевіч, А.І. Кроль, і многіх іншых.
Разглядаючы пейзажы, наведвальнік будзе нанава адкрываць горад: пазнаваць знаёмыя месцы, вуліцы, будынкі, параўноўваць з сучасным Мінскам, фарміраваць уяўленне аб гарадской атмасферы мінулых дзесяцігоддзяў. Аднак галоўнай асаблівасцю твораў выстаўкі з’яўляецца тое, што яны здольныя перадаць настрой горада. Узіраючыся ў графічныя і жывапісныя работы, вы абавязкова адчуеце цёплае летняе паветра гарадскога вечара або дыханне студзеньскага марозу на навагоднім катку; падзеліце радасць сустрэчы студэнтаў на летняй практыцы або адзіноту пажылога мінчаніна, які назірае за горадам з акна сваёй кватэры.
Творы выстаўкі адрозніваюцца разнастайнасцю сюжэтаў, і настрой горада мяняецца ад карціны да карціны. Аўтары ўважлівыя да сілуэтаў гістарычнага цэнтра (Л.А. Дударэнка, Г.Г. Паплаўскі), спальных мікрараёнаў (А.М. Тычына, А.І. Кроль), пасляваеннай архітэктуры (І.П. Рэй, Б.У. Аракчэеў ). У сюжэтна-тэматычных карцінах У.М. Пасюкевіча, В.К. Яўсеева і А.М. Пуцейкі Мінск паўстае асабліва святочным, настрой горада перададзены праз адлюстраванне асаблівых момантаў у жыцці гараджан: танцаў на пляцоўцы пад адкрытым небам, вячэрняга катання на каньках, вяртання ў горад з падарожжа. Вылучаюцца працы Ф.М. Бараноўскага, дзе заліты сонцам горад можна бачыць з вышыні шматпавярховых будынкаў. Персанажы яго работ – жыццярадасныя дзяўчаты, якія працуюць на будоўлі, і ўвесь Мінск распасціраецца перад імі.
Асобны раздзел экспазіцыі прысвечаны творчасці А.М. Тычыны. Прадстаўлены яго літаграфіі, лінагравюры і акварэльныя замалёўкі горада 1970–1980-х гг. Гэты шматгранны мастак стварыў вобраз Мінска – ідэальнага горада-фенікса, адроджанага з руін.
У экспазіцыі працуе відэазона, дзе можна паглядзець дакументальныя фільмы пра горад.
Кошт білетаў:
6,00 руб. – для дарослых;
4,50 руб. – для студэнтаў, пенсіянераў;
2,50 руб. – для школьнікаў.
Час працы:
серада – нядзеля, 11.00 – 19.00 (каса да 18.30)
пл. Свабоды, 15
+375 17 270 43 66
